Bə ha xalqi dardi mandəkəson, ictimai nufuzi rost kardəkəson, dınyo co xalqon dılədə loyiğinə vırə qəte, deəvon çokə munəsibət oqətəkəson çə həmonə xalqon ictimai-siyosi navəşənonin – lideronin! Hiç şubhəmon ni ki, çəmə xalqi – çı Tolışiən jıqo mərd, ləyoğətin, mudrikə ruşnəfikə navəşənonış heste! Çəvonədən qıləy, çı Umumrusiya Tolışon Diaspora sədr İsmayıl Şabanove!

Ha xalq şo bəbe ki, əqəm əyən bənə İsmayıl Şabanovi şəxsiyyətinə, dınyovindemininə, zırəkə, mudrikə zoəş bıbu!

İsmayıl muəllim bo Rusiyə Federasiyadə jiyə tolışon zıvoni, mədəniyyəti, mental xosyəton, adət-ənənon, ijən co milli-mənəvi dəyəron jiye, inkişaf kardero ıştə dasto oməyon kardə.

Əv ıştə fəaliyyəti əsos leytmotivi ha vaxti, ha vırədə de qıləy çokə şuari bə vırə rosındə: “Tolış çı dınyo ən ğədimə, ən mədəni millətonədəye! Bə qorış əv kon dəvlətədə jidə bıjiyo, bəpe de həmonə dəvləti konstitusiya, de beynalxalq ğanunon, de sivil, mədəni, numunəvi roy bəştə loyiğbə həxon bırəso!”

İ.Şabanov inə vətənədə - Azərbaycanədə jiyə tolışonən mutəmadi əloğə oqətedə. Bəvonən, həmişə ıştə məntiqinə, mudrikə tövsiyon doydə: “Tolışon çı Azərbaycani bınəynə xalqin! Ivrə çəvon tarixi vətəne! Əvon ıştə vətənədə bəpe, bəştə ha milli-mənəvi təsisaton noil bıbun! Çımi roən, AR Dövləti Konstitusiya, Beynəlxalq konvensiyon, BMT ğəbul kardə ğəroronin! Ha tolışi mənəvi ğarze ki, de cəsarəti, de ğanuni roy ıştə həxon tələb bıkə! İnşallah, Tolış de roy, bı nezıno bəştə ha maddi-mədəni həxon bərəse!”

Əzizə tolışon, şinə duston! Imruj çəmə ın mədəni, alicənab, mudrik, ağılmand, ruşnəfik, ğıryətmandə boli – çı İsmayıl Şabanovi movardə ruje! Çəmə ın xosə boli 1965-nə sori aprelə manqi 15-də çı Lankoni rəyoni Havzəvu diədə moəmo bə!
 

Əmə, tolışon jıqo ləyoğətinə, fədakarə övladi bə Tolış xalqi baxş karde qorış bə Xıdavandi-Aləmi "şukur", bəçəy pı-moə “Bərəkallah, Əhsən!” – votdəmon! İsmayıl muəllim ımruj bə Tolışi ha problemi, bənə merdi ıştə duşi dəhaştə kəse! Əv çı Tolışi navədə qıləy vəşə çoye ki, həmişə ruşnə doydə!

İsmayıl boli, az Şıməni həm ıştə nomo, həm çı Azəri – Tolış İctimai İbemoni həmmə uzvon nomo de movardə ruji munasibəti dıli sıxto təbrik kardəm. Bəşmə xəçəcon, dıroizə umur, xeyzonə səadət, şəxsi konədə ve yolə mıvəffəqiyyəton orzu kardəm! Xose, mıborəke! Bıji, çəmə İsi! Həzo soron bıji!
 

Əmə de Şımə fəxr kardəmon!

Bə Şımə de ve yolə hurməti,

Mehdibəy Səfərov
Azəri – Tolış İctimai İbemoni sədr