Ulduz Həşimov! In nom bo ha ıştəni dərk kardə Tolışi doğmaye, xose, azize! Çumçıko, ın mərdə, ləyoğətinə, cəfokəşə, səvodinə ruşinfiki ıştə səj evə jə, be təmənno, be mınnəti boştə xalqi - bo Tolışi zıvoni, mədəniyyəti, tarixi, folklori, adət-ənənə nığo doy, rostbero dıli sıxto sərosər hejo bə koye!
İntasi, ə tolışon ki, ıştə milli-mental mədəniyyətiku deyəro eqnən, ıştə inə zıvon çı yodojon beka, bə ciddi psixoloji kompleks eqnən, əvon ğasti Ulduz muəllimi zındənıbun?..
Ə xonəxonən bıdə ıştə çaşon okən, bıvindon, bızınon, Ulduz muəllim kiye?
Oxi, Ulduz muəllimi hiç vaxt ıştə kardə koy, kəşə zəhməti reklam karde xoşış omedəni! Amma, ə xosə kon ki, Ulduz muəllim kardə, çəvon bə Tolışi bə xəy mislış ni! Ən əsosi, ın mutərəqqi kon bə kali assimlə bə tolışon sənibəton bəştə milli ıştəni ifadə oqarde prossesiro ve yolə koməkin!
Ulduz muəllim həmən, ve xosə-alicənab xeyzonsoybe! Əv ıştə nəsli - çı Məydoni nomiən deştə mudrikəti, ağılmandəti, mərdəti daim bılınd oqətə qıləy sıprişe!
Əmə fəxr kardəmon ki, çəmə xalqi bənə Ulduz Həşimovi çokə ruşinfikə zoəj heste!
Ve hurmətinə tolışon!
Imruj, 2 fevral 2014-nə sor tarixədə, çəmə xalqi ve şərofətinə, qıləvıjnə zoə, çı Ulduz muəllim Həşimovi movardə ruje! Imruj çəy 46 sinış təmom bedə!
Ulduz muəllim, Şıməni de movardə ruji munasibəti dıli sıxto təbrik kardəmon! Xose, mubarəke! - votdəmon. Bəşmə xəşəconəti, dırozə umur orzu kardəmon! Xıdovandi-Aləm Şımə həmə orzun bə vırə bırosno!
De ve yolə hurməti,
Mehdibəy Səfərov
Azəri Tolış İctimai İbemoni sədr
