Çı ha xalqi ictimai-siyosi jiemonodə jı odəmon hestin ki, çəvon nomə qətə sati, bə odəmi dim-çaştım qıləy xoşə təbəssum omedə, ciyənıj sırdə, ruhış obedə!.. Zındəş ki, Xəlləği-Aləmi ın odəmon Bəştə xəlqış kardə qovmi qıləy ənomje doə. Əlbəttə, jıqo qıləvıjnə fərzəndon de aşmardə hisobi sayjon veən bedəni! İntasi, Pərvərdigara hiç xalqiən jıqo çokə loyiğinə fərzəndonku xali kardəni!
Xıdovandi-Xudaya Bə Tolış xalqijən jıqo qıləvıjnə, ləyoğətinə fərzəndonış baxşış ka!
Çəvonədən qıləy – Mirfəyaz Likməkaniye (əmə bəy de nozi "Miri” votdəmon)! Az de cıvonə zoə təxminən 2 sor heste ki, yəndı zındəmon. Bı 2 sori əy çımı dılədə məxsusi vırəj qətə! Etiraf kardəm ki, sıftə-səıftə Miri xosyət mıni veən okardənıbe. Ve sərtbe. Siyosətıj kambe. Hakənəy əvındim ki, internetədə bəştə həmsöhbəton kobudəti kardə...
Bo həxi xotı vote lozime ki, Miri bı 2 sori çənə bə nav şə! Az fəxr kardəm ki, əv bə çımı ha məsləhəti quş doydə, pemandə, nopeqət kardə, qərar bekardə, hərəkət kardə. Miri ıştə həmyaşıdonku xəyli fərqış heste. Çumçıko, əv lap cıvonətiku çı mudrik be fəlsəfəj omute!
Miri çı Azəri – Tolış İctimai İbemoni Cıvonon təşkilati sədre! Əv ıştə xalqi – çı Tolışi ha ictimai konədə navəşəne, lidere!
Miri həmən ki, Tolışi zıvonədə bədii cəhəto ve mukəmmələ poeziya nımunon muəllife! Əçəy nıvıştə şeron ve tolışon zıvoni əzbərin! Çı Tolışi məişəti jiemonədə, milli ıştəni ifadədə, ıştəni dərkədə əy norohət kardə problemon de eyhomi, de zərfəti, de ləzzəti ıştə nıvıştə şeronədə tərənnom kardə!
Az, "Əhsən!”- votdəm bə Mirfəyazi pı-moə ki, jıqo şəxsiyyətinə fəzəndjon perosnə, həm boştəro, həmən boştə xalqi – bo Tolışiro! Xıdo bəşmə nəvə-nəticə ğısmət bıkə, ey yolə insonon!
Imruj – 2014-nə sori fevralə manqi 16-də çəmə xalqi ve ləyoğətinə zoə, şair, ictimai-siyosi navəşən Mirfəyaz Likməkani movardə ruje! Miri 1988-nə sori fevralə manqi 16-də Liki rəyoni Veri diədə moəmo bə!
Az həm ıştə nomo, həm çı Eldəniz muəllim Quliyevi nomo, həmən çı ATİB həmə üzvon nomo Mirfəyaz Likməkani de movardə ruji munasibəti dıli sıxto təbrik kardəm! Bəy xəşəconi, dırozə umur orzu kardəm! Bıdə Miri bı nezono boştə vəyə bıkə, xeyzon bısoxto! Əməniən vanq bıkə bə vəyə, bıdə şoy-şo bıkəmon, vəy kəş oşandəmon, raxs bıkəmon!
Mubarəke, Miri!
Bəşmə de ve yolə hurməti,
Mehdibəy Səfərov
Azəri – Tolış İctimai İbemoni sədr
