Mikrafoni ıştən jı şe ni! Əv qıləy qədə, kırtə siyo conəvəye; da rujən mizi səpe bımando, bəy ənəho fik doəkəs əbıni.

Mikrafon bəvədə bə bəlo peqardə ki, çəy duqmə eqətdən, bo qəp jəyro, beədəbəti nıbo, doydən bə odəmi dast. Eyhanə, bo kəşero kameran dıçu kardəbun bə odəmi, bəvədə çə xonəxo dastədə ım qədə, kırtə siyo conəvə əlbəhol peqardə, bedə qıləy “siyo əjdəho”! Siyo əjdəho, çı əjdəho?.. Çı “siyo əjdəho” səm de sardona aki eqətdə odəmi. Ə odəmən ıştəni gin kardə, qəv oməy vadoydə, ıştəniən cəmati dılədə beabru kardə, oqətdə.

Xokbəsəti bəvədəy ki, de elmi-texniki tərəqqi anqıl bə ım tojə noxəşi ən ve bə tolışon coni ariz bə! Şərti nomış “Mikrafonə sindrom” bə ım noxəşi viruson ımruj çı tolışon venə hissə şəxsiyyəti, milliıştənidərki, mənəviyyati, əğeydə arıştero, de bə çəvon xun dəşə! Bı səbəbən ım noxəşi bo Tolışi ısətnə vəziyyəti ve xətoynə noxəşiye!

“Pıxərəğon”

“Mikrafonə sindrom” ıştə soxə viruson bə tolışon 2 qılə sosial qrupi psixika həniyən ve pevlo bən, çəvon mazqi miningit kardən. Bı nıvıştəyədə əmə, çı həmonə sosial qrupon qıləy həxədə dıldard bəkamon. Im qrupi numayəndon ıştə milli mənşə, yəne tolışətijon əvino kardə, iradəjon zəif bə kəxəlisonin! Jıqo beməxə odəmon ənə ven ki, çəvon aşmardə hisob gin bə! Bı xosyətədə bə tolışon nomi şərti bınəmon: – “pıxərəğon”.

“Mikrafonə sindrom”i paraziton bə “pıxərəğon” çı kəno kali puçə təsironku muqavimətış zəif bə şəxsiyyəti çoknə vırti-vılo kardən; çoko ki, vəyonədə, xəy-şəronədə bə “pıxərəğon” dast mikrafon doydən, çəvon veni ıştə moə zıvoni oqətdən, bino kardən çı tırki zıvoni peşti arışte-arışte, ıştə fikon cılə-cuyə karde-karde bı zıvonədə bo “filosofəti” (bənə “sugu sərin olsun, çorəki isti olsun” və s. şablonə ifadon) karde...

Bı tisbirədə bə “noxəşinon” nek-neki ıştə dədurə “nık-nıki” orıxındən, bə odəmi con xəcolətiku ujə-ujə eqındə. Odəmi micoz xərob bedə, dılış təkedə...

Bə jıqo zəminbə “pıxərəğon” bedərəcə əməlon Şımənən məvuji, ve rast oməjon...

İntasi, qıləy xoşbəxtəti bəvədəy ki, de “pıxərəğon” dıli sıxto bə səmimi əloğə dəşdəş; kamişəy təbliğot bardəş, profilaktik söhbəton kardəş, əvoni bə sə dəndəboş ki, “aybe, co xəlxon bəmə məsırvon” – votedəboş, çəvon kaliyon xıyə kardəbunən, veni çı tənğıdiku nəticə bekardən, qədə-qədə bə ro oqardedən...

Əmə şəv-ruj bə təbliğatimon, bə çanpoçəmon ki, ıştə xalqi “pıxərəğon” co xalqon dılədə ov kardə, bənə “mikrafonə sindrom” tisbirədə kali-kali otəşqınyə bəlon virusonku peroxnəmon. Iştə şəxsi nımunədə dastomon omə ve kon kardəmon... Bəbe vote ki, ıştə dıl, xəşiyəti, Xıdo doə umur, şəxsi jiyemoni əsas hissəmon bə Tolışi xalqi milli-mənəvi hestemoni nığo doy, rost be həsrmon kardə, ğıbonmon doə...

Xıdo Tolışi jıqo ğədo-ğəzəronku, dardo-bəlonku deəro bıkə! Amin!

İnşallah, navoməyonədə bə “Mikrafonə sindrom” noxəşiəti məruz mandə tolışon dıminə qrupi sosal-psixoloji vəziyyəti həxədə dıldard bəkamon...

Mehdi bəq