Məşhədi Sadıx Məhərrəmizoə moəo bıə 02.11.1964-nə sori Masalli Miyonku diədə. Miyonku məktəbədə ibtidai iyən əsas təhsil sə bəpeştə 1982-nə sori oroxniyəşe Hışkədə miyonə məktəb. Ko kardedə Miyonku miyonə məktəbədə. Kəbəsoybe, ço kinəş, i zoəş heste.

Çap kardəşe tolışiədə-tırkiədə nıvıştə şeerono ibarət iqlə kitob: ”Ömür kitabı” (B-2008,146 səh.)
 

BALƏ ŞİNE

Balə şine, şinon şine!
Jıqo bızın, anqivine!
Iştən nəfəs, ıştən cone,
Çəy rəğədən ıştı xune.
Iştı dəvom, ıştı sone.
Həm dıli sə, həm çəy bıne.
Bə har kəsi ğısmət bıbu.
Conədəş zu, moğət bıbu.
Tano çokə olət bıbu.
Əv ıştı dıl, ıştı cone.
Yol ki be yolə kə bıbu.
Bəştə yolon nokə bıbu.
Bo el-toybə şəkə bıbu.
Əvəsori meşi şone.
Baləsoybbu, balə yolkə.
Bəyo şini, vəyə bıkə.
Şoyvo bıkə, xıvət nıkə,
Sadıx, balə şələ qone.