 TOLIŞƏ KİNƏ
Xonçə boği vılij tı,
Çimənisə qılij tı.
Betı nəfəs əkəşnim,
Çımı çaşij, dılij tı.
Az bıqardom bəştı sə,
Çimənisə, daştisə.
Mıni çaşkə boğədə,
Saat qardəy həştisə.
Çaşon siyo, bəv oşım,
Məmandəmon dı vırədə.
Çımı lampə bıvoşın,
Bıvəşəmon ivrədə.
Siyo aspi nal bəbe,
Sipyə dimi xol bəbe.
Bılbıl tıni bıvindo,
Vıli tono lol bəbe.
Tı dəvlətij, tı molij,
Məmləkətij, məholij.
Iştı sinə dı dınyo,
İ dınyosə ve bolij.
Az bıqardom bəştı sə,
Çimənisə, daştisə.
Mıni çaşkə boğədə,
Saat qardəy həştisə.
TOLIŞƏ MAHNEYON
Az aşığim zərdəbə,
Ro şedə bə Zardəbə.
Az ıştınim, tı çımı,
Çəmə sıxan kardə bə.
Az aşığim, bı bandi,
Çı bandiku bə bandi.
Marde heste, qarde ni,
Tınij çımı pəvandi.
Honi roysə vılim az,
Tojə çımən, qılim az.
Çımı boği boğbonij,
Çə boği boğbonimaz.
Tı xanımij bə boli,
Məmləkəti, məholi.
Tıni ki to bəqəte,
De ceyroni, məroli.
Barzəbolo, siyo çaş,
Zoon dıli toknedəj.
Xıdo bəxne, tı kenə,
Çıki lampə bəvoşnej.
Dınyo bədo itkə kam,
Tıni dəqiş nibəkam.
Maqi roysə bınıştoj,
Vəyo tıni çaş bəkam.
Şəv-ruj xıvət hardedəm,
Bəji bedəm, mardedəm.
Tıni birdəm vindyədə,
Iştəni qin kardedəm.
Iştı sinə mərməre,
Dimonı sə məxməre.
Çıki lampə bəvoşnej,
Çəy siyo sığ covhəre.
Tıni vinde, əy tobə,
Nə qınoye, nə tobə.
Tokyə şəvon oşımij,
Oşməşəvon astovə.
Mol-dəvləte ıştı ləvz,
Xıdo doə beəvəz.
Iştı çaşon bıvindo,
Bəji bəbe mardəkəs.
Kiə aspi yalisə
Uzənqisə, nalisə.
Sa kərə ğırbon bəşem,
Iştı dimi xolisə.
Dıyo yoli bole moy,
Oməj, dınyo bızın, boy.
Oşməşəve, xəlvəti,
Beşi bəsə honi roy.
Məmmədhuseyn Əliyev QAİL 1925-minnə sori aprelə manqi 25-ədə çı Lik rəyoni Qurdəsə diyədə bə dınyo omə. Miyonnə məktəbi oroxniyəbəpeşt çı ADU filoloqiya fakultədəj handə (1949-1954). 1947-minnə sorədə "Səs verirəm" (Sədo doydəm) nomədə bə iminnə nıvıştəyıj, Likədə beşə "Kolxoz yolu" (Kəlxozə ro) rujnomədə dərc bə.
1940-minnə soriku çı Liki, Lankoni muxtəlif məktəbonədə muəllimətıj kardə. 1960-minnə soriku Azərboyconi Ənıvışton İyəti uzv be. 1977-minnə sorədə de əçəy təşəbbusi AƏİ Lankon zonə şebə obə. Çə rujiku tosbin bə rəhmət şe, həmunnə şebə məsul kotib bə.
1977-minnə soriku mutəmadi Lankon rəyon deputaton səvetəti deputat vıjniyə bə.
Bə nıvıştə ofəyəmoni de şeiri bino kardə M.Əliyev peşı ğırbinə nəsr əsəronıj bə ğələm sə. Əçəy "Qayaların səsi" (Halon sədo), "Dağlar oğlu" (Kuhon zoə) i. c. povest, iyən romanon dərc bən. Əçəy "Prokuror" pyes N.Vəzirovi nomədə bə Lankoni Devlət Dram Teatrədə bə təmoşə noə bə. Bəçəy, bə Səvet İttifaqi Ğəhrəmon, Həzi Aslanovi həsr kardə poeməj Məmməd Rahimi yolə ğıymətıj doə.
Əv çı AƏİ Lankon zonə şebə orqan bə "Şəfəq" jurnali təsisəkə, iminnə redaktor bə.
M.Əliyevi tolışi zıvonədən şeironıj nıvıştə.
Yolə ədib 1994-minnə sori iyulə manqi 16-də bı dınyoj bido kardə.
İnformasiyə hozo bıkə: Nəriman Əğəzodə
|
