ALİ NASİR -60
01.05 tarix dıqlə zumandə tolışə şairi movardə ruje. Əli Nasiri 60 sinn təmom bedə, Mehman Qaraxani zoə 58 sinn. Əli Nasiri 1988-nə soro Milli Lıvemoni vaxtonku, Mehmani şoqird vaxtonku çok zınedəm. Har dıqlə şair ısətnə Azərboycon ədəbiyoti ən qeramiyə numayəndonin. Har deynən bo tolışi xəlği ve azizin. Mehmoni ofəyəvoni həxədə 2 məqalə, Əli Nasiri barədə 5 məqalə nıvıştəme.
Bə Əli Nasiri həmən 2 şeir həsr kardəme.
(1)
Camal Lələzoə “De Lələ sıbət” kitobi bə çap hozı kardəbimon. Çəy “Nasir oməy” nomədə qıləy şeir ve xoş ome bəmı:
NASİR OMƏY
( Bə şair Əli Nasiri)
Imruj bə Ğızlovo somon,
Dılonədə bo voşne çoon,
Deştə eli bə vindemon
Xəlği yolə şair oməy.
Tolışıstoni har tono
Ostoro, liko, Lankono
Qırdə bən Zərdusti sonon,
Bə məclis piron pir oməy.
Iyon çe milləti balon,
Ağılmandon, barzə bolon,
Şoyvo kardən rukon-yolon,
Bə şiron məclis şir oməy.
Əştə millət bəsə poysə,
Diə kardə bə zoon resə,
Votdə: şukur, Xıdo, ısə
Çəşi nur, dıli qir oməy.
Vətən çe har milləti kəy,
Avə dəbasto Həşi vəy,
Şairi vanq avəçəkəy—
Çe şairon mahir oməy.
Çe nomerdon kılo bısut,
Çe deşmeni qılo bısut,
Bo milləti dılo bısut
Nasir oməy, Nasir oməy!
2006 (“De Lələ sıbət”, B- 2007, s. 22)
Azən çı şeiri təsiriku jıqo nıvıştıme, bıhandon ray bıdən, kom vəzmine?
BO ƏLİ NASİRİ
(Camal Lələzoə votəynə)
Bə çəmə di mehmon ome,
Bə behişti ğılmon ome.
Çəşon ruşnə, conqir ome,
Şair Əli Nasir ome.
Şair xəlqi nunəlokəy,
Jıqo bızın çəmə elkəy:
Bə Fələstin Yasir ome,
Şair Əli Nasir ome.
Boştə xəlqi coni bısut,
Çı deşmeni kəybə bıdut,
Çı milləti faxir ome,
Şair Əli Nasir ome.
Haft sor zindon əsiri bə,
Osnə kındə dəstqiri bə.
Çı Kərbəlo Bəşir ome,
Şair Əli Nasir ome.
2006 ( Votəme, ya votəmni”Boku- 2013)
(2)
İ kərə Əli Nasiri de telefoni ibənd şeir vığandəşbe bomı. Ve təsir kardışe bəmı, lorzınişe çımı ruf, ın şeirən jıqo bə miyon beşe:
BƏŞTI ĞIBON
Tı Tolışi merdə baləş,
Həxiku nıqardə baləş.
Nasiri həmdardə baləş,
Iştı bilə bəştı ğıbon.
(Əli Nasir)
Çımı dıli kəbob məkə,
Betı əy dıl hisob məkə,
Tıniş çəmə yolə səkkə,
Iştı boli bəştı ğıbon...
Zəmon oməy, devron qarde.
Inə zıvon boydəğ karde,
Bə ən yolə fayə varde,
Iştı boli bəştı ğıbon...
Merdbiş, mandiş vətənədə:
Səyvonəti məydonədə.
Haft sor hıtiş zindonədə.
Iştı boli bəştı ğıbon...
Ozodəti mıboriziş,
Yolə şair, qonə sipriş,
Tı bəməno vey aziziş!
Iştı boli bəştı ğıbon...
01.05. 2011 ( “Votəme, votəmni “ (B-2013, s.75-76)
Təbrik kardedəm Əli Nasiri 60 sorə, votedəmon: Şair, bud bıbu ıştı 60 sinn, 100 soron bıji deştə eli, deştə xıyzoni de xəşəconi!!
De yolə hurməti,
Allahverdi BAYRAMİ
01.05.2015. Masalli, Mədo
