 Bə həmmə ğıyətmandə tolışon!
Əzizə tolışon! Sıftə şımə həmməni çı zindaniku de Xıdo nomi səlomləmiş kardəm. Mıni müdafiə kardə ba ha kəsi ıştə təşəkkürəti kardedəm, əmondəyonən hiç nıbo ıştə həxi müdafiə karde vanq kardəm. Xıdo ıştən şımə həmməni hifz bıkə!
Əzizə bıvon və hovon! İminə kərəm, ın oxonə 25 sorədə kali sırron bəşmə okarde pidəme. Im sırri əsas məğzən ıme ki, rə-di ıştəni zindonədə vindəbim və ayo hiç qıləyən yolə təcübən vindənıbim. Şıməku nyo kardənim ki, de bə 21 iyun 2012 sori züm çənə vışkiyə bə milləti şoyə omərujon roədə dasimko oməyon kardəme. Həni ənnə züm vışkiyə....
Hələm lap hırdənətiko orzum ım bə ki, i rüj ıştə milləti dınyoədə məhşur bıkəm, əçey dard-səron bə dınyo bırosnom, bə tərəfədə jiə de tolışon təmasi bərpa bıkəmon, rəhməttığə Zülfüqar Əhmədzadə kəşəyon iyən əçəy nıvıştəyon bəştə xəlği oqırdınom... Bəbe vote ki, ım missiya qismən bıbo bə vırə rosniye qorəm ısət ıştəni xəyli xoşbəxt hisob kardedəm.... Xəyli rohətim ki, həni xəyli rüşinfikə Tolışon çı dınyo ha tərəfo ıştə sədo bekarde zındən.
Əzizə rüşinfikon! Şımə həmmə çok zındən ki, ın çand əsron-soronədə de həzo-həzo ron çəmə milləti çı zəmini plono gin kardeyo həzo-həzo planon kəşə bin... Amma Xıdo nahaştışe,- çəvon orzi çəvon dılədə oqətışe... Bı roədə Zülfüqar Əhmədzadə, Şöyüb Mürsəlov, Müzəffər Nəsirli iən co kəson ıştəni ğıbonşon doy... Züşon vışkiə qədər şəvi-rüj bo milləti omərüjono koşon karde....
Amma ğıbon şin... Ğıbon şe prof. Novruzəli Məmmədov... Qavar azən bəşem, qavar mıniən arako bekardışone, amma ımon bə sə dəşdənin ki, de bı cürə şəytonə ron qıləy ğədimə xəlği gin karde əbıni.
Əzizə tolışon! Bəzne be şıməku çikisə bə dıli qınyəm, amma ımən bə çəmə ümumi ko qorəni bə, bıdə mıni bıbaxşo, əqəm ve qüsur vindəbe.... Bəşmə həmməni lovə kardəm ki, i bıbənən, bəyəndı con bıvotənən, con bıməsənən... Bıdə hiç kəs ıştə həxi müdafiə kardeko nıtarso. Həni nə kana əsronin, nə 37-38-nə sorononin, nəən rəhmətlığə Nəvuzəli müəllimi bə sə vardə vəhşiəto koon nyo karde bedə... Isət dınyo ha şeyi vində... Mıni qəteədə bəçımı sə, bədəni əxtə mıştışon eküə ki, hələmən səm bə gij şedə. Jıqo bızın des bə marde je pidəşonbe. Iştənənən de tolışi rəhbər bə idorə dasti... Həzi Aslanovi votdəm... Kaş şımə ə generali rangi-rüfi vindənonbəyn... Çımı lap bəbolətim omedəbe bəy. Əv ve vicdoni əzob kəşdəbe, oxo əzınni be ki, ə yəxəliyə igidi - "general Şimoni” nəvə bı cürə tarso bıbo, ıştə millətiko imtina bıko... Amma əv ımi qavərən bəçmı qorəm kardəbe... Mıni xilas karde pidəbe... Amma züş vışkedənıbe. Çımı ısətnəni ko bardə müstəntiqi yolən tolışe - Xolmilije, amma əvən co cürə bədbəxte...
Şımə həmmə çok zındən ki, mıni boçi ısət qətəşone...13 iyunədə Ostoroədə bə "Tolışə şəv”i dəvordine bəmı ğadəğə kardəşonbe... Az 100 faiz zındəbim ki, ın şəvi peşt mıni ya bəkışten, ya bəğəten... Əve ki, ıştə oxonə "qullon” de bə oxoy ğandıme, ə şəvi materialonən nome bə yotube, bo omərüjə nəsliyo... Məzın əyo votə "ım evrovizioni milyard sərfışon ka, amma qıləy nəticə nıbe, amma əmə bepül Azərbaycani, Tolışi, meyxana bə dınyo nışonım doy” fikim çı ölkə iminə odəmon xoş oməni, əve həni çaş karde holışon mandə ni, əlbəsahat mıni qəte bə qəror omin. .. Bəçımı sə qınyə mıştonən bı çimi qorəm be və ə odəmon çəy odəmon bin, ə fəğır Həzi çəvonku ehtiyot kardəbe...
Əzizə bıvon iən hovon! Həx çəmə tərəfədəye, əve ko bıkənən, az bəşmə məslət kardəm ki, de qeyrətmandə tırkonən iyən co milləton ivrədə ko bıkənən. Çəvonən veyni mıni müdafiəş karde. Mıni qətə "odəməhən” millətiən zındəm... Əve ivrədə ın ölkə xilas bıkəmon bəpe... Əncəx demokratik-hüquqi məmləkətdə ha millət bərabər bedə... Əve, bı roədə dastiku oməyon bəpe bıkəmon.
Bomıroən dıvo bıkənən... Xıdo bəşmə YAR bıbo...
Hilal Məmmədov,
Boku zindon
|
