Nəvuzə id bo tolışon ve doğma id bero, ıştə ğəydon de Şımə pay-baxş kardəm.
Imsornə Nəvuzə idən mande bə peşo... Dınyo Ariona xalqon veni Nəvuzi ıştə milli id, tojə soriən həmonə rujiku hisob kardən. Tolışonən hakəzə! Tolışə xeyzonon ım idi ıştə kanədə məxsusi deştə adət-ənənon, de şoy-voy dəvonero, ıştə dasto oməyon kardən. Fəqət.., hələ ki, iqlə ıştə kanədə!
Həyf! Sa da həyf!
Həyftoği bardəm ki; tolışon ıştə ım azizə idi ıştə inə zıvonədə, kuçonədə, məydononədə, ijən co ictimai vıronədə, ivrədə, de təntənə hurrey, bənə xalq teatrə bevardmoni dəvone imkoniku məhrum bən!
Totalitar Sovet İmperiya ateizm parçəmi jiyədə bə Nəvuzə idi dini doğmə jəşbe, ğədəğəş kabe! İntasi, tolışon niyonkıleən bıbu, ıştə Nəvuzə idi həmişə de təm-təraği dəvonin. Əğılətico bə çımı yod omedə; çəmə divojon kulə şəvi, Nəvuzə idi çı cur lozime, deştə adət-ənənon dəvonin. "Kuli-kuli çoşanbə", "Kışti ğande", "Norşudi vote", di xəmənədə Kəçəli, Kusə, Bahori kinə, Şıvoni bevardə oynon, tolışə jenon patə nozık, kılçə, xavlo, zerəni ləzzət ta dosə ımrujnə ruj çımı yodo beşdəni!
Xosə duston, hurmətinə tolışon!
Çımon həxədə boçim nıvıştə? - Bəşəy xotı nıvıştəm ki, çımı tay-tuşon, əmijədə çımısə yolə piyəmerd-piyəjenon çəmə xalqi - çı Tolışi ğədimə adət-ənənon kam-ve xəbədon. Əve, çəmə yolə ğarze, qıymonsə bənə yolə kuye ki, ımoni bəştə nuperəsə cıvonə nəsli rosnero, dasto oməy bıkəmon!
Həyf! Ve həyf bıbu ki, çəmə mənsub bə Azərbaycani ımrujnə hukmət bo çəmə xalqi - bo Tolışi zıvoni, mədəniyyəti, ğədimə folklorə nımunon, adət-ənənon, ijən co milli-mənəvi hestemoni hifz kardero, nığo doyro, hiç qıləy maddi-mənəvi dastək doydəni! Əksinə, ve holonədə hətta, bımon maneye bedə...
Bəle.., çımı azizə hovon, bolion! Imruj, ıştə xalqi milli-maddi irsi, mədəni-mənəvi dəyəron bə navomə nəslon rosnero, əmə de jıqo çətinə sosal, maddi, psixoloji problemon vəbəvə mandəmon!
Jıqo sosial-maddi-psixoloji mande-holədə Tolışi xəymandə ruşinfikon bəpe de ağli, de padxəşi boştə xalqi mande-jiye həkəm bımandon, dasto omə koməkəti bıkən.
Çoko bunim kardən - intasi, ım ve kame!
Bə ko kardə kəson mane be, əvoni çı həvəso eğande ğət əbıni!
Bəştə xalqi mande-jiye dast qətə ha kəsi çaşonsə novne lozime!
Əvonin çəmə xalqi nicot, əvonin çəmə san tacon, əvonin çəmə piron, dini-axunon!
Əqəm, ha tolış i zınqır bəştə xalqi dastək bıbu, əmə çı dınyo ən ləyoğətinə xalqonədə qıləy bəbemon!
Nəvuzə idon - Əvə soron mubarəke, xosə tolışon!
Bə Şımə de ve yolə hurməti,
Şımə boyli, Mehdi bəq
