Ha, şinə boon, xəyli vaxtbe deşmə bə vindemon ome zınedənıbim, çimiyən kali səbəbonşon hestebe ki, bəşmə vote tikəy çok ni. Hiç zınedənim komi oqətom, komi bıvotom, xəyli votə çiyonım heste, qılə-qılə bəvotem, bə kon qılə nubə nırəso, peşo bənıvıştem.
Bino bıkəm çı Şuşa radioku, ərmənion Şuşada tolışi zıvondə radioşon okəy, aləm qıni bəyəndı, kali odəmon tadibəsə bə İroni tolışə prezidenti noməşon nıvışteşone ki, tı bəçəmə milləti ko ıştə qədə sə dəmənə, jıqo bızın ın milləti bı 2-3 xonəxo aspardəşone, sıxanım bımədə ni, har xonəxo ıştə fiki vote ozode, dessə bə vaxti ki, sı riyə danıvardo, ehanə sı riyəku davarde çəy cızzəbulə kəfşəni eqətedə, ha, nomə şe rəsəy bə İroni podşo, əvən çiç bıvoto coke? "Az çı Əhmədi zoə Nicatim, boştə millətiro (yəne bo tolışon) radioən obakam, televindemonən, şımə kişon ki, miyonədə çulə arışdəşon?” In kəxəlizon ısət bə Əhmədi zoə Nicati sərosne zınedənin ki, ərmənion bı koədə marağşon heste, əvon boştə maraği qornə har ko bəkan, əlğərəz, Əhmədi zoə Nicatan oqarde votşe ki, məmləkətonən heste, rəhbəronən heste, bəy ovardkən.
Jıqo çiyon bəçəmə rəhbəri nıvışte xətoye, əhvala Nəvuzəli məllim, 2-3 kərə nıvıştşe, şe qurum-qumbaz. Çaş kay əbi ki, çəmə hukumətən ərmənion cəvobi bədo, əncəx çəmə hukumət çı koyku nəticəş benıkaşe, tolışi zıvondə haftədə 1-2 saatinə rədioş onıkaşe, çiç bıkəmon, çımon sə ğale, əmə bıçımon yod dəşedənimon, bə qornə ərmənion çımon hanvəku istifodə kardedən, dubu-dubu, məsəme ərmənion tolışi zıvondə televindemonən obakan. Okən çiç bəbeeee, ijənən 2-3 xonəxo bə İroni ısətnə tolış nıbə prezidenti nomə bənıvışten ki, tı kiş ki, bo tolışon televindemon okardedəş? Əv çiç bəvote, çı cəvob bədo, zınedənim, əncəx ımi zınedəm ki, hejo ın 2-3 kəs rost kardedən bə İroni prezidenti nıvıştedən, bı movzuədə bəçəmə prezidenti nıvıştəkəsi qətedən, şodoydən bə dılə. Ki pidəşe ki, çəy kə be xıyzonsoyb bındıno, ən çoki hejo bə İroni prezidenti nıvışteye.
Ha, peşo məsəme ki, ərmənion İronədə Tolışşunasati tədris karde pidəşone, bəştə ənqıştə qıləy ğoymə ğıççə jəme, zınəme qıləy rınəy bəbe, jəqoən be, i kəs (tarsiku çəy nomi qətedənim) şe bə İrəvon ki, həminə tədbirədə iştirok bıkə, hiç ə kəxəliz bə İrəvon nırəsəy iyo jiyə tolışon mandin bə nubə (nubə hiçə mənadə neya) ki, əv tolış ni, çəy çəmə nomo qəp jəy həxış ni, əmə əy tolışətiku bekardəmone! Yo bə odəmi bəvoten ki, tikəy ıştə fikədə korrektə bıkən, əqəm ə odəm tolış nıbusə, şımə əy keynə bə tolışəti vardəne iyən əy çoknə tolışətiku bekardedəşon? Ne, əqəm ə odəm tolışbusə, şımə kişon ki, bə Xıdo ko dast ğandəşon, odəmi millətəti ləğv kardedəşon? Sıxanım bımədə ni, ki bə tv beşe, ki bə qəzet beşe, qa votedən əv Qarabaği dave qəhramane, çand həzo ərməniş kıştəşe, qa votedən əv xaine, separatətiş kardəşe, Qarabağıj həvatəşe, zınedənim har ruj bə qıləy zırno həvo raxs kardə ın odəmon de kon əqidə jiydən, əncəx əy zınedəm ki, ımon bəpe bənə ruyəninə keçə ıştənşon bə miyon şodoəşon bə nəbəyn, çı bıznom, qavar bə tv beşəkəson, bə qəzet musahibə doəkəson qıləy "ve sağ bi” səşone, har çi be bəzne, çımılğ ni. "Ve sağ bi” votme bəçımı yod prezidenti səçınəti oməy, votedən peş prezidenti səçıni bə moybala zoəşon 150 həzoyinə "araba”şon doəşone ki, ıştı pə zəhməte bəhəre….
Ha, yo oqətom, davardom bə məsələ, ə ruji yutub soxədə çəmə yolə şair Əli Nasiri vindıme, xəyli soronbe əy vindedənıbim, vote bəbe ki, hiç dəqiş bə ni, Xıdo bəy sofə jimon bıdə İnşallah, ha, kam mande dəqıjyom, Əli Nasir tolışi şer votedəbe, şeri nomən "ıştə həxi bəsənemon, bəvindeyon”be. In şer bəmı qıləy ləzzətış doy, tı boy diyəkə, çı Əli Nasiri, yaan co şairon jıqo patrotə şeron məseyədə xəyli peştıpur bedəm, hətto bə ciqə omedəm, bəştə tırkə-tolışə balaliyonən votedəm ki, şımə nom boçi bı həxə koədə ni? Dessə keynə şımə bəştə moə, nənə zıvoni marde çı kənoku diyə bəkaşon? Boçi bı zıvoni oqətero bə mucadilə, bə canq beşedənişon? Dessə keynə co zıvondə qəp bəjeşon? Kıve şımə tolışəti? Əvon bəmı çiç bıvoton coke? "Kon navadə şə tolışi balalionədə i kəs bı həxə koədə heste ki? Kon navadə şə tolışi balalion tolışi zıvoni oqətero bə canqin? Çəy nomi bıvot, əmənən dəşəmon bı həxə ko”. Bə rostə sıxani çiç bıvoti? Hurmətinə handəkəson, az jəqo "navadə şəkəs” zınedənim ki, çəy bala bı koədə bıbu, şımə zınedəbuşonsa çəy nomi iyo bınıvıştən, azən bəştə bala-bulon nuşodəm, bənıvışteşon?
Atabala Babayev,
Boku,
"Tolışon Sədo” N: 56 30 oktyabr 2013
