 Qıləy Lankonıj bo hande şedə bə şəhri-Qum, çand sori bəpeşt bə i haftəlığ oqardedə bə Lankon, omedə bəştə kə, çəsədəy vindedə ki, əçəy hovə bə şıti ov jəy pidəşe, parsedəki: şinə hovə, çiç kardedəş? Hovə çəy cəvobədə votedə ki, "bə şıti ov jəydəm, bardedəm bo həvate”. Həminə lankonıj votedə ki: şinə hovə, jəqo məkə, hərome, bə kə həromə pul məvə, kam bıbu, həlol bıbu. Hovə bə bıyə votəy quş doydə, şıti bardedə bə vıjor, dessə çoştə mandedə, hiç ki bə şıti nez omedəni, jıqo duz i həftə davardedə, bıyə bə şəhri-Qum şeədə ıştə hovəku parsedə ki: şinə hovə, ıştı vıjor çoknə dəvardedə? Hovə xəcolət kəşe-kəşe votedə ki, bəs az bə şıti ov jəyədə, bə i-dı saat həmmə əhvatim, ısət i həftəye bə şıti ov jəydənim, hiç şıti ğıyməti xəbəsəkəsən ni.
Lankonıj xəyli şedə bə fik, peşo ıştən bəştə votedə: ey dıli ğafil, ənnə zori Lankonədə qıləy həlolə mənot ni ki, bo ın şıti bıstəno....
Məzhəkəyinə məhkəmon...
D-r Hilal Məmmədovi məzhəkəyinə məhkəmon deştə xudi şedən, ın sifariş çıkono doə bə, zınedənim, əncəx əy zınedəm ki, sifarişi soyb ve vaza odəme, hiç ki əçəy doə sifarişi vədə tov vardedəni, ıştə çaşonşon epuştəşone, ıştə dıli kəybəşon jəşone, zıne-zıne ki, çı d-r Hilal Məmmədovi hiç qınoş ni, (əslədə heste, çəy qıno TOLIŞ beye, əvən bənə veynə tolışon MANQURT bəbəy, ısət nıştəbe ıştə kədə, bə Türkan Şorayi dyə kardedəbe) əçəy məzhəkəynə məhkəmə bardedən, bəbanən, bəy koən bədon, çumçiko sifariş jıqo doə bə, ın sifarişi navi əncəx i kəs səy bəzne, əvən ki, hələlik bı ko reaksiya doydəni, ısət d-r Hilali həxədə bəy çiçonşon votəşone, Xıdo bəzne, əncəx ə odəm hələmən bı zori zımbəzırımbi "məsedəni”, ə odəm hələmən bə nəzə səydəni ki, əçəy "podşoəti” zəmonədə tolışi alimon qılə-qılə çı sıra bekardedən, ə odəm hələmən bə nəzə səydəni ki, bə tolışi hiç Stalini zəmonədəən ənnə doğ jəşon ni, çimi oxo çiç bəbe, iqlə Xıdo zınedə, əncəx bəpe əmənən bənə milləti ıştə ruşinfikə zoon mıdafiə kay bıznəmon, bəpe əmənən bənə milləti çə ruşinfikə zoon ko davom bıkəmon, həmməkəs çı dınyo kuç bəkamon, hiç ki yo daimılığə ni, əncəx iqlə çiy ıştə yodədə oqəte lozime: Popoki nomən tarixədə mandə, səhl sumbati nomən, ısət bəpe tolış bıvıjno, əv de ko ro bəşe, de Popoki ro, ya de səhl sumbati ro. Popoki ro şe ve çətine, ın roədə har çi çaş kəy bəbe, çumçiko şəytoni tulon, ve əfsus ki, çəvon dılədə xəyli "tolış”ən heste, "tolış” nomi məsəsati cındo bedən, nıştən bo "donos” nıvışte, bəs məvotbən fılonkəs bəştə tolışış votşe. Həminə ko çı d-r Hilal Məmmədovi oxminə məhkəmədəən bə, izohat doə şahid votedə ki, "bəs Hilal 1993-nə sorədə bə Lankonədə jiyə tolışon votedəbe ki, şımə ıştə aradə tolışi qəp bıjənən, əv demi "milli-irqi ayrıseçkilik” dənoydəbe”, ısət bı jıqo dəyusi bıvotoş ki, ay nocins, ruşinfik bə qornə ruşinfike ki, bəştə moə zıvoni dəqər doydə, ruşinfik bə qornə ruşinfike ki, bə camaati sərosnedə ki, çı Xıdo əmonətiku – İnə zıvoniku mığoyət bıbənən, həni bənə tı bəştə moə qəvi dılə "tu” kardedəni, odəm bəpe çənnə nocins bıbu ki, bəştə moə zıvoni "milli-irqi ayrıseçkilik” bıvoto? Ha şinə handəkəs, çəmə ısət dıqlə romon heste: Popoki ro, səhl sumbati ro, har kəsən ıştə ro ıştən vıjnedə....
Unikal aksiya
Manqi 15-də çı d-r Hilal Məmmədovi məhkəməbe, məhkəmə "qapalı” dəvardedə, çumçiko pidəşon ni ki, camaat oşkoə məhkəmədə çəvon nocinsəti bıvindo, çəmə iqlə romon heste, məhkəmə soədə çı məhkəmə orəxe çaş kay, əncəx çəmə müdafiə komitə qıləy çokə təklifiş doy: məhkəmə soədə ıştə qəve de təbibə tənzifi epuştedəmon iyən tam-tami jəy mandedəmon, jəqomonən kay, veyə informasiya agentliğon çəmə ın aksiya kəşəşone, vote bəbe ki, çəmə ın aksiya bə dınyo sədoş eğandışe, hukumətən mot mande, nıznəşe çiç bıkə, polison eməyn vəy, əncəx vindeşone ki, əmənən bənə bəvon lolimon, korimon, əncəx ıştə etirozi de lolyəti, de koryəti nuşo doydəmon, dessə oxo dyəmə vəy pemandin, ha şinə handəkəs, əncəx qıləyən ko heste, ın etiroz aksiyon bəpe har məhkəmədə bıkəmon, bımiyən zu lozime, odəm lozime, "az deştə tolışəti fəxr kardedəm” votə zoon bəpe çəmə toniku bıbun, interneti qəhrəmanati dəvarde, ısət patrot be lozime, myonədə be lozime, umum heste ki, çəmə cıvonon bı koədə əməni cali onibəqəten...
Çı RTMM-i benubəynə konfrans
Çəmə xəlği yolə zoə, yolə şair Əli Nasir fevrala manqi 5-də çı RTMM-i sədrətikuş istefo doşe, əçəy istefo ğəbul be, mınşon bə RTMM-i sədr vıjnişone, az həminə benubəynə konfransada votme, ısətən votedəm: az cali hiççi kay əzınim, bəpe çı RTMM-i İdarə Heyyət ko bıkə, bəpe çı RTMM-i ha üzv bəştə qıy qıləy ko peqəto, ısət yol-yoli qəp jəy vaxt ni, ısət bəpe əmə boştə milləti çiçsə bıkəmon, əncəx bı roədə çəmə xəyli çətinətimonən bəbe, əməni bə farsi, bə erməni, bə müxalifəti anqıl bəkan, anqıl kardəkəson dyə kardedənin ki, əmə çı respublika Ali Qanuniku bə kəno beşedənimon, əmə ıştə Konstitusion həxon pidəmone, hejo əvoni bəmə çaşapuri bıdən, vəsmone, əncəx hiç ki bəmə hiççi be mübarizə ədəni, bəpe əmə ın çiyon çəvonku bıpyəmon, ha ruj bıpyəmon, ha haftə bıpyəmon, bə nıpyəkəsi çiç bədon ki?
Prezidenti şöbə müdr
Çı Prezidenti qıləy şöbəş heste: milli azlıqlarla iş şöbəsi! Çəy yolən hiç "milli azlığədə” ni, Müzəffər Talıbov nomədə qıləy xonəxoye. In odəm demı i kərə dim-bə-dim qəpış jə, i kərəən de telefoni, hejoən votedəki "Milli Məclisin yarısı talışdır, nə istəyirsiz?”, sıxani rosti az MM-də tolış vindedənim, ki vindedə, çoknə vindedə, əv əçəy şəxsi koye, lap MM-si həmmə tolış bıbu, ım çiçi dəqiş kardedə ki? Hiççi dəqiş bedəni, əmə de raketi sürəti assimilə bedəmon, ın ko navi bəpe həminə "milli azlıqlarla iş şöbəsi”, yəne Müzəffər Talıblı bıstəno, əv ısət boy de Eldəniz Quliyevi telefonə qəpədə "talışlar öz xarabalarında talışca danışsınlar da, gərək helə TV-ləri olsun” votəşe, ın odəm dyəçəmə nomi həvoyə pul səydə, hələm bəçəmə kəonən "xaraba” votedə, ısət çəyku bəki şikayat bıkəmon? Bə həminə Milli Məclisi "tolış”ə deputaton? Ay-hay, əqəm çəvonku i kəs ciqəynə zoə beşe votşe ki, "Müzəffər Talıblı, unutma, sən milli azlıqlara görə dövlətdən pul alırsan, bütün milləti niyə təhqir edirsən?”, peşoən ın məsələ hejo həminə MM-si plenar iclosədə rostkə... Əncəx az zınedəm ki, çəmə "deputaton” ımi ni bəkan, bəçəvon lolyəti qornə bəçəmə kəon hələm "xaraba” votedən, çoke, i kərəən bəvindeşon ki, hejo çəmə kəon xərobəşon kay, ısət pidəme bışum dəşum bə Müzəffər Talıblı kabinet, bıvotom ki, ıştı 12 qılə "xərobə” heste, bəmı ısət 12 sore qıləy "xərobə” doydənişon, bə qornə ki, çımı bəşmə doyro rışvəm ni, bə qornə ki, çımı rışvə doə dastım ni, bə qornə ki, az 20 sore bəşımə jə mahne raxs kardedənim, ın "bə qornon” veyən aşmarde bəbe, əncəx ən yolə "bə qornə” əve ki, çımı ğələmi arışte zınedənin, ni bəznenən.....
Qəzeti maliyyə
Həminə Müzəffər Talıblı "talışlar nə istəyirlər, qəzetləri də çıxır” votedə, əncəx bəçəmə qəzeti maliyyə koməkəti kardedənin, qavaran koğəzonədə nıvıştedən "talış dilində qəzet buraxılması-100 min manat”, ə puli qavaran "ebardedən”, əncəx fakt əve ki, bəçəmə qəzeti hukumət koməkəti kardedəni, əksinə, ha cürə təzyiqonən kardedən, ısət boy çəmə tolışonən qılə-qılə mandedən bə kəno, nə Moskva tolışi diaspora, nə Sverdlovski tolışi diaspora, nə Pribaltika respublikon tolışi diasporon bə qəzeti koməkəti kardedənin, bə çaşin, çiçi bə çaşin, zınedənim, əncəx əy zınedəm ki, çımı şə ro bəçəvon xoş omedəni, az ve sərtim, həminə mərəz qədə-qədə bə Azərbaycani tolışonən dəvardedə, həmməkəs bəmı votedən ki, qəzeti profili dəqişkə, çoknə dəqişkəm, əy votedənin. Çoknə qəzeti profili dəqişkəm ki, çəmə milləti qıləy yolə zoəşon zindonədə kıştşone, ısətən co yolə zoə de nıbə ittihomon dənoəşone bə dılə, çoknə qəzeti profili dəqişkəm ki, bəçəmə milləti sə ha hənəkon vardedən, bəçəmə kəon "xaraba” votedən, çənnə çəmə kəon abad bə nin, çənnə çəmə kəon "xaraba” bəndınen, az qəzeti profili dəqiş əkənim, qəzeti bəhvatem, ıştə dasto bebakam, əncəx əçəy profili dəqiş əkənim! QƏZETİ HAVATEDƏM, SƏKƏS HESTE? Lap həromə mənotonən, onsuzən bı məmləkətədə həlolə mənot ni, ğəbul kardedəm....
Rafiq CƏLİLOV,
celilovrafiq@mail.ru,
"Tolışon Sədo” N: 37 (49), 20 fevral 2013-nə sor
|
