 FƏĞIRƏ MERD
Dəvardə əsri 50-nə soronədə çəmə diədə sədrəti kardışone pı-zoə: Məlo Cəbrəyil de İsrafili ( Xıdo ha dıqlə rəhmət bıko) Esə nıştən, pıə ıştə zınəyon, təcrubon umetedə bəştə zoə. Sohbət-sıxan bə vırə rəsedə ki, zoı İsrafil votedə bəştə pıə:
-Lələ,briqadir Şiəllə anə bəmı xoş omedə, hiç məvot, çəysə zəhmətkəş, ğeyrətmand, sokit, fəğırə odəm nibən...
Cəbrəyil zevılə sırə kardedə, i qılə sıxan votedə, co çiy ne:
- Ay-hay, hələ əy peşo bəzıneş.
Arədə mıddəti dəvardedə. Ruji sovxozi hesobatə iclasədə, çı rayoni numayəndon tono Şiəllə sıxan sedə, rəhbərətiədə, təsərrufatədə çı ğusuron heste, qılə-qılə aşmardedə. Sədr İsrafili xırtə hışq bedə. Həminə ruji anə təloş dəvonedə, dı ruj bə lef-boloşnə qınedə. Xəbə bə əbrəyilə mamu rəsedə ki, ıştı zoə bərk noxəşe. Se ruj çəy paliyo şedə-omedə. Çominə ruji de zoə rubəru bə sufrə nıştə Cəbrəyil votedə:
-İsrafil, çımı balə, esə zınəy ə fəğırə merd çeçunə odəme?
BİCOK BƏHMƏN
-Ve-ve xəşəcon bıbu day!
Həştminə sinif sə nıbə noşone Bəhmən poçti mudir. Merd ıştə nıvində rujon vindəbe: Diko bə Urusət, urusəto bə di vığandə pasilkoon dılədə çiçon nəbin?
Məxləs, Bəhmən bə puli xəzon eqıniəbe. Çiy dənıvarde: Bəhməni tojə kə kardışe. Bə kə vəyu vardışe. Jeni səpe jen vardışe.. Kəy kutisə kə kardışe... Maşini dumo maşin səşe... Bəhmən de osmoni çilinqə şedəbe. Əncəx...
Bəhmən konco qıləy reçinə kinə, nozəninə vəyu, məhbubə moynə vindedəbe, hayıl-mayıl bedəbe bəy. Eqınedəbe dumo əy. Bı sahədə bəçəy sə vey qulqulon omedəbe, əmmo həyo kardənıbe.
İ ruj vojorədə qəvçərəz, meyvəcot səy məcolədə çəşış pexəvəy bə qıləy moynə, ağlış beşe səyku: -İlahi, ım çı məhbubə vəyuyey, məvuji bə vojori ruşnə əv doydə.
Bəhməni harçi çı yodo bekardışe. In vəyu bə konvırə qarde, Bəhmənən qarde qırdo əy: bə reçinə moynə har tərəfo edəsəy, noqsanış nıvinde: siyo çəş-bəvon, sırə diyən, sırafə lıputon, sipiə dim, purə sinə, viriskə şıvəkon, nəcimə lınqon... Bəhməni ağlış fırsınie, qıləy beğafilə səlom doşe bı moynə, erəxəy bəçəy dıjdə çəşon:
-Xıdo səlom bıbu bətı, xosə moynə, çe ğəşənqiş tı. Çı komonədəş?
Vəyu damə nıbe, dimış qəte itonə. Bəhmən qarde bə tərəf, dandonon sipi kardışe:
-Detınımexo, ceyronə vəyu.
Vəyu qətışe ıştə rəfiğə dast, dəro qınin-şin bə navi. Bəhmən qarde ome çəvon vəş pebıre:
-Ha dıynən bəmı xoş omedon, çı ğolloğ bıkəm bəşmə?
Vəyuon vojoro beşin. Bəhmənən dumo əvon ğərəbəğərə poyəy. Rəfiğon rast omin bə qıləy polisnəfəri, çiçsə votışone bəy. Polis pesəməy, oqarde rəsəy bə Bəhməni, votışe:
-Tovə polis şebə bışamon.
Polis Merzə bə Bəhməni çok oşnəbe, Bəhmənən bəy. Əncəx əy çok zınə vəyu iqlə sıxan çı Merzə yodo peşedənıbe:
-Tədbir nıvindoş, ıştıku şikat bəkam. Çəmə dumo eqıniə bə merdi qıləy dastəmurə bıdən.
Bəhmən sıre-sıre ərkonə bə polisi votışe:
-Demı zərfət kardedəş? Şebədə çı kom heste? Çiç kardəme ki? Ğanunon ıştısə çok zınedəm ha!
-Bəhmən, ıştıku vey hurməton vindəme. Əmmo bı səfə tıni bardənim bə şebə. Bəştıro ıştə vəzifə qin karde əzınim.
-Zə, çı vəzifə?
-Kəxob, zındəş çıki dumo eqıniyəş? Bə çımı rəisi jeni!
Bəhmən hutbe, hışqbe mande bə səpo. Cım nıdoşe. Fikədəş dəvarde: "Vaveyla, bə çı bevəcə hənək dəşim? Esə çanə xarcım bebəşe.”
Oməyn bə polisə şedə. Bəhmən nışte rəisi kəybə qəviku, şe bə dumot, anə bəştə dımjon doşe, behisob. Hardəyğə bəyo curi hıkm handedəbe.
Tike bədiqə Bəhmən vanq kardəbe rəisi paliyo. "Sıpə zoə çı zəhmine. Çı zorə bədənış heste. Əşivobən ki? Xıdo, çı vəziyətədə çoknə beşum? Rəhm bıkə, ro oj bıkə, çı otəşiku beşum, bətı ğıbon bəşem, Xıdole!”- Həzo fik-xəyol dəvarde çı binəvo dılədə.
Polisi rəis edəsəy bəy, səyku bə po de məsxərə çiysə vote pidəşbe ki, zanq oməy, selektori sədo təmiz məse bedəbe:
-Firuz, ə sıpəzoə, doy varde bə huzur?
-Ha, ənə iyoy.
- Hələ çəyku xəbə bıstən, bəmı çeçunə çəş jəydəbe, çımı dumo eqıniyəbe. Çəy çəşon ku bıkə, lınqon barışt.
-Mələk, norohat məbi, ə odəm iyo dəşeku, bəmınən çəş jəydə. Çəşonədə titəş heste, əğıləti vərdışe bəyku. Bəy Çəşjə Bəhmən, Bicok Bəhmən votedən... Iştənbəsə ni, bəy doydən çəş jəy, ıştənbəsə ni...-Rəis vote-vote sıredəbe. Çəy hırınqonə sədo bə co mənzilonən şedəbe, polisi koəkon bəyəndı çəş jəydəbin, sıredəbin: rəisi kef bəpeye...
İkərədə sırəyku mande, herəke erəxəy bə Bəhməni, jəşe zikkə:
-Rədd bıbi çıyo, oğraşşşş!
Sentyabr, 2012, Masallı
Tolışon Sədo qəzeti, N: 34 (46), 14 noyabr 2012
|
