 Şirəliyev Maqsud Məsti zoə (foto) moəku bıə 05.12.1972-nə tarıxədə Masalli rayoni Xanalion diyədə. Di əsasinə məktəb oroxniyə bəpeşt tam miyonə təhsil səşe Sığdaşti məktəbədə. Bə hınəsənəti, mədəniyyəti, ədəbiyyati bıə behəddə maraq ıştənış bə buruz doə bəvədə hələ məktəbədə handeədə. Həm ıştənə məktəbədə, həmən rayon səviyyədə bıə ə tədbir, musabiqə, musamirə, muzakirə bıə ni ki, Maqsud əyo iştirak nıkə. Anədə fəxri fərmonon, tarifnomon, diplomon, fotoon, vidoon, albomon hestışe ki, hisobış ni. Esətən çəmə Tolışi zonədə dəvoniyə bıə həmməy tədbironədə Maqsudi ıştə vırəş heste. Masalli Mədəniyyət iyən Turizm şöbə ən fəalə aktyoronədə qıləyni Maqsud Məsti zoəy. Nezə vaxtonədə ATV "Tanıdım səni” bərnamədə Maqsudi fəalə iştirak, əçəy uğuron hələ yodo beşəni. Maqsud həm Masalli, həm Lankoni xalq teatr kollektivon navdəbışı uzvonədə qıləye. Əçəy ifadə bə kino kəşə bıə Tolışi Şəbani obraz bənome.
2008-nə sori Masalli Mədəniyyətə kə nəzdədə Respublika xalq Teatron festifal dəvoniyə bedəbe. "Xocaliku omə sədon” nomədə faciə-dramadə Maqsudi bardə sərrol bə mıkafat təqdimbe. ( A.Şaiqi nombə Kukla teatri binada nişo doə bıə ın təmşo bə yolə hay-ku səbəbbe. Sərrolon arədə Maqsudi seminnə vırə qətışe).
2005- 2007-nə soronədə de Xanəli, Nicati ssenari, rejissorəti silsilə bə tolışi kəşə bıə tolışə kino serialonədə Şirəli Maqsud şirkət kardəşe bənə kinoaktyori. "Dıvo”, "Tolış, bıvot, bısır dəmə” (1-3) filmon bə dınyo pevılo bıən. Çımon məşhurbeədə beşıbhə Maqsudi hestışe yolə rol.
Maqsud Məsti zoə ıştənən kino kəşəşe bə tolışi: "Cıni həmlə”, ssenari, rejissorəti, operatorəti həmmə çəye.
Maqsud Məsti zoə təbiəti aşığe. Xanalionədə "Xanahi” nomədə qıləy seyrənqo (istirahətə mərənqo) soxtəşe, aləm bəçəy təmşo mandə. Vişə- dəy dılədə çiçon kardə bıəni! Popilınqon peyku bə ji sərost kardə bıən. Peyədə bı vırə honiçaşmə okırniyə bıə. Ruşnə hartərəfə vəşedə. Dınyo nadirə doon, vılon iyo kaştə bıən, doy bınədə, çuonədə ustul-mizon soxtə bıən,bo istirahat karde bina- mənzılon dutə bıən. De vote sə əbıni çıvrə məziyəton, bəpe boy bıvindi...MDB məmləkəton haciyo xeyzonumjənə iyo omedən, mənəniyə istirahat kardedən. Ən yolə məziyyətış ime ki, iyo tolışi mətbəxi nozə neməton deştə har pirpazi iyo bə fəaliyyəte...
Maqsud həmən istedadinə şaire. Bə tırki- tolışi nıvıştə xəyli əsəron hestışe. Çəy iqlə şeeri edaştəmon bə hurmətinə bahandon . Əsər bəçəy qinbə pıə həsr kardə bıə (Çı əsri sıftədə Masalli penə vişonədə kaştə bıə çətənəhion çandkəson beriz-bexəbə ebardışe, qin kardışe, çəvonədə qıləyniən Maqsudi pıə Məstibe).
A.A.Bayrami,
ÇƏŞIM MANDE BƏ LƏLƏ RO
In kə ruşnə pekardəbiş,
Bəmə ve çok diə kardəbiş.
Tı Necuədə çiç kardəbiş?
Keş kədə mardəbəyş, lələ.
Tı sımıston bekardəbe,
Iştə xeyzon şo kardəbe.
Dodo çəş as ru kardə bəy,
Keş kədə mardəbəyş, lələ.
***
Hico ənə dard əbıni,
Piçi tono sard əbıni.
Necu roədə pard əbıni,
Lələ konco mardəbu, ni?
Canomojış kədə mandə,
Syo pencəkbe əçəy tandə,
Çəy zoə bəyo Yasin handə,
Lələ qinbə, qasbu mandə?
***
Bəro şeədə əvəsorbe,
Bılbıl boğo handedəbe,
Bo lələ ğəb kandedəbe?
Lələ xəbə doəkəs nıbe!
Çı fələki dim syo bıbo,
Dardım veye- de dəvə bo.
Əvəsori idəvə bo,
Çəşım bəbe bə Lələ ro!
***
Ha kəs şedə bəsə ğəbi,
Çı çokbe çəyən ğəb əbi.
Maqsudi dıl kəbob nəbi,
Keş ki Lələ peydo bəbi!
2007
"Tolışon Sədo” nöm 17 (29), 11 may 2012-ci il |
