 Çəmə milləti yolə ustad–çı Xanəli Tolişi "Ha Xıdo” şeiri handeko peş bərk bə dümot şim...
Çi şeyri məğz ıme ki,”Bəştə həxi bərəsemon kəynə, ha Xıdo?”... Xanəli müəllimi co tərəfo fik kardə ki, oxo boçi "çəşimon kü, qüşimon kor, zıvonimon lol”e?!. Əçəy bə milləti sə vardə biə bi zülmon–"Işti səbrən çıl sor ne, ço sa sore bən” səbrinə şikayati handeədə, rəhmətlik Zülfüqar Əhmədzadə kəşə dard-səron bə çəşi na omedə: Əvən,düz 80 sor bəna ıştə "Davarda Rüjon” poemada zılmkoron bə çəmə milləti sə vardəyon təsvir karde-karde, iberdəm bə Xıdo de joqo misron şikoyət kardə:
”Əçəy bo milləti sütdəni holiş,
Iştı çəşonkuən eqınyə Toliş?”
Ve hürmətinə Tolışon! Şımə çok zındən ki, az hələm ponə əsron 80-nə soronko rəhmətliğə Zülfüqar Əhmədzadə nıvıştəyon tədqiqim kardə və iminə kərəm əçəy əsəron bəbe vote ki, həmməni bə xəlqi oqırdinyəme. Vallah və billah əmə ımrüj əçəy kəşə zilləti hiç i zınqırən kəşe halədə nimon. Çand manqonnə de həzo-həzo co məhbuson ivrədə de "stalipon” poezdədə bə Sibiri sürgün be və əyoyən de həzo-həzo zılmon jiə təsəvvür karde bedəni... Az ısət bənə məhbuson de "voronok”i (həbsxanə maşini) bə nim-1 saati bə məhkəmə şeədə və oqardeədə 1 rüj hıtedəm, ısət diəkə ə fəğıron çiçoşon kəşə... 1942-də əv Sibirədə bə rəhmət şedə... bəvədə əçəy maddə güya "de silahli üsyan karde” (yəni bə höküməti əleyh beşe) be. 5 sor doəşenbe, amma 4 sor jiə... 2007-də prof. Novruzəli Məmmədovi qətışone. Əvən guya bə İroni ko kardəşe, de 274 maddə (bə dövləti xəyanət) mühakiməşon karde və 10 sorışon do, əvən cəmi 2 sor nim jiə...
Isətən mınişon qatə və de 3 qıləm bəyəndi ziddiyyəti, absurdə maddon mıni "narkobaronən”, "davləti xainən” ...bekardəşone. Isət bəmı çand sor bədon, az çəxtə bəjiyem, ımi Xıdo bəzne... Amma ıştə fərqi çiçədə vindəm, bıdə bıvotom: Valla, billa, qavarən bovə nibəkaşon, az bə zindoni bənə adi jimoni i poə diə kardəm... Əlbəttə ki, deştə nezon, ğohum-qəbilon əloqə ni, ya ve məhdude... Amma çiç bıkəmon?! İnşallah, əvoniən dəspardəm bə Xıdo və ha rüj Bəy dıvo kardəm ki, çəvonkuən əv ıştən mığoyət bıbu...
Əzizə Tolışon! Votem ıme ki, ğət ruhiku eqınyənim və bə Xıdo şikayətçiən nim, bəbe vote ki, əncəx ıştəno bəy şikoyət kardedəm... Yəqin ki, şımə çımı "Zindonnamə” handəyone. Az əyoyən ıştə haliku bə Xıdo şikayət kardəm... Əve ki, ijən de jəqo ıştə dimi qətdəm bə həmmə tolışon ki, sıftə ıştə qınon pio (səpe.red) ko bıkənən, peşoən bə Xıdo jıqo lovə bıkənən ki, əməni bə ğeyrəti biə, tarsi çəmə dıliku qin bıkə... İnşaallah, bəvədə Xıdoən bəmə peşt bəbe... Əve ki, ey çəmə yolə Ustod!
Xıdo ıştən bə həqqi ro şəkəson peşt bəbe... İmən çımi dı-se sətron:
Vay bə rüji. mandə dı-se merd həni,
Zikkə jedən, bə məxloği rəsdəni,
Çaşon kü bən, qüşonən ki məsdəni
Bəvədə lap çəmə ha ko most bəbe,
Xıdoən çiçən bıkə - rost bəbe...
Xıdo çəmə milləti MERDON ve bıkə iyən bəvon zü və səbr bidə!
Hilal Məmmədov,
Kurdəxani həbsxonə,
Tolışon Sədo qəzeti, N: 34 (46), 14 noyabr 2012
|
