Beytul-moli həxədə vemon məsə, vemon handə. Hətto votedən ki, Əli əleyhissalam xəlifə beədə bəçəy tono omə mısılmononku əparsi ki, demı şəxsi koyın heste, ya bə şikoyət oməşon? Ki ki əvoti "şəxsi kom heste”, bəvədə çı xilafəti şami oəkıştı, ıştə şəxsi şami əvoşni, Çəyku parseədən ki "ya Xəlifə, boçi jıqo kardedəş?” Əv jıqo cəvob ədəy:
- Bə şəxsi koon çı xilafəti şami voşne əzınim, əv BEYTUL-MOLE!
D-r Hilal Məmmədovi ko
D-r Hilal Məmmədovi vəkilon dəvardə manqi 17-də bə Apelyasiya Məhkəmə çı Boku Qonə Cinayəton Məhkəmə bekardə Ğəroliku Apelyasiya şikayət kardəşone. De Ğanuni bəpe bı şikayəti i manqi dılədə diyə karde vocibe. Isə boy d-r Hilal Məmmədovi şikayət bəçəvon "çaş çiydəni” ki, bəy diyəkən. Əvon ve çok zınedən ki, d-r Hilal Məmmədovi ko Azərbaycani məhkəmonədə orəxəcəğin Avropa Məhkəmə bı ko diyə bəka, yəne Azərbaycani doə ğəlpə ğəror vəy ifşo bəbe. Isət ımon mandən ovi-otəşi aradə, dılşone ın ko bə 2-3 sori mıddət dırozkən ki, (jıqoən 1 sor nim davardə) Avropa Məhkəmə ğərol bekardeyədə d-r Hilal Məmmədovi zindonədə hıtə "staj” bə 3-4 sori dəmando. Nımardimon çı hukuməti jıqo fırıldağonən vindemone. Çəmə dasto çiç omedə? Ğəyrəz bə Xıdo dıvo kay hiççi. Xıdo ıştı kəybə okə Hilal məllim, tı çənə zindonədəş boəməro aşişəti ni, çəmə jimonən hejo bənə zindoni dəvardedə.
Qəzeti vəziyyət
Davardə numrədə nıvıştəmbe ki, mol bəştə xıvandi obəşe, yəne qəzeti lanqe yolə ko ni, çumçiko azən lanqedəm. Bəmı kali xəbon omedəbin ki, "fılomkəs” yo-vəy votedə ki, az ha manq bə qəzeti ənnə pul doydəm, şımə mədən. Ə iqlə "fılomkəs” bımi- bəy votedə ki, bə qəzeti dast məqətən, şıməni bəqəten, bovə kardedənıbim, "duyə qəpe” əvotim, ın xəbon bəmı doəkəsonən "rə-di bovə bakaş” əvotin. De minvoli 1 sorisə veye ki, məydonədə calinə con doydəm, çəmə "patroton”, zıvonədə pərqo bəkəson ısə boy mıni vindeyədə "imkanmon ni ki bətı tikəy dast bıqətəmon” votedən. Azən bovə kardedəbim.... Əncəx davardə manqədə ve mətləbon səpe "siyo pərdə” rədd be, ve çiyon bomıro oşko bin. Az hejo fik kardedəbim ki, çoknə bedəxo Azərbaycanadə jiyə tolışonədə hiç kəs bə qəzeti dast qətedəni? Har çi de Xıdo piye oj be, Xıdo bəmı quciliyə həxi nüşoş doy. İ xonəxo bəmı oqarde votşe ki, ha numrədə nıvıştedəş ki, bə qəzeti Azərbaycanadə jiyə tolışon dastək bedənin, ço noşukurəti kardedəş, əmə, kaman bıbu, bə qəzeti ha manq komək kardedəmon, ki 10 mənot, ki 5 mənot, qırdə kardedəmon, doydəmon bə "fılonkəsi”, qıləy zıvelə sırəy mınış qətşe, oqərdim votme ki, "fılonkəs” votedə ki, " i qılə patrotə zoə ni ki, bə qəzeti komək bıkə, 1 mənot bıdə, pidə diyəy dim-bə-dim ın sıxanon bıvotom”, həminə odəm şe bə dumut, votşe: "neye, jıqo ko ni bəbe, əmə ha manq bəy pul doydəmon, az bı ko oxo bebəşem”, həni ın ko çoknə orəxəy, bə i yəndı çiçşon vote, zınedənim, əncəx əy zınedəm ki, ın nə iminə koye, nə oxminə. Ə rujiyən yasə məclisədə qıləy co tolışım vindıme, xoş-beşiku bəpeşt bəmı oqarde votşe ki, "de fılonkəsi (ım co "filonkəse”) botıro 20 mənotım ğandıme, beytul-molbe, bəmı doəşonbe ki, bə qəzeti bırosın”, şem bə çort, yəne ə odəm ki, hejo çı Xıdoku, çı İmomonku sitaton vardedə, "qəzet çəmə çaşi ruşnəy” votedə, yəne ənnə erızyə ki, ənnə piyəçın bə ki, ənnə exroc bə ki, bə 20 mənoti ehtiyocış bə, bə "beytul-moli” çaşış noə? Çı bıznom, yəne əmə ənnə exroc bəmon? Handəkəs vote bəzne ki, çə "fılonkəson” nomiyən ənıvıştim əni, (əvon ın məqalə handeyədə ıştəni "ovəynədə” bəvinden) ne, ni bənıvıştem, əvoni rost kardəmone bə Tolışə bandon sə, ısət az çəvon nomi bınıvıştom, bəvoten ki, Rafiq pəxeləti kardedə, çəvon "yol be” ebarde zınedəni, qədə-qədə sərəsedəm boçi USTOD çımon dasto bə həzor oməbe, əv aburinə odəmbe, ımon ısə boy bənə dıyo vo bozin, az hiç kəsiku çaş jəydənim, lap çəvon nomi qılə-qılyən nıvışte bəznem, əncəx ehtiyoc vindedənim, ə odəmon bomıro exroc bin, nə az bə nomonədə odəmon zınedəm, nəən əvon mıni nıznon, "beytul-moli” hardəkəson, məsəne? Şımə həni bomıro nişon, azən boşməro NİM!
Sərxana mamu
Çəmə Sərxana mamu (Əşrəfi Sərxan) "Əmə iyən çəmə zıvon” nomədə qıləy sil-silə məqalon nıvıştəşe, ın numrədəən çı Sərxana mamu çə silsilə nıvıştəy qıləy poə bədomon. Əmə bə har xonəxo nıvıştəy de hurməti diyə kardedəmon, əqəm bə nıvıştəyədə co xonəxo təhqir kardedənıbunsə, boçiyən ə nıvıştəyon nıdəmon? Qəzet çı milləti ovaynəye, bəpe milləti çı fikədə be bə miyon bekə, çimiyən iqlə roş heste: qəzetədə bo həmmə ənıvışton kəybə okay. Çı Sərxana mamu fikon çənnə rostin, vote əzınim, əncəx qıləy çiyən bıvotom ki, çımınən əslım Likije, yəne çı Sərxana mamu ğandə kırtəğədə bəmınən baxşə rəsedə, ım ıştə vırədə. Isət boy jıqo nıvıştəyon, jıqo fikon nyo kay bəçəmə milləti foydə ədəni, jıqo məsəlom bə mızokiro bekay lozime, bıdə millət bı jıqo problemon ıştə fiki bıvoto, məvotən ki, jıqo problemon nin, hestin ki, bə myon beşedə, hestin ki, 93-də çəyku istifodə kardışone, boliyon, problemi nyo kay ne, çəy səpe şe lozime, hisob kardedəm ki, Sərxana mamu nıvıştəy bə ğəribçiəti dənoy ne, çəy həxədə fik kay lozime. Əncəx bəçımı quşon kali çiyon rəsəyn, qa votedən az bə Sərxana mamu 100 mənotım doəme ki, çəy nomo ın məqalon bınıvıştom, qa votedən Sərxan mamu bəmı 100 mənotış doəşe ki, az əçəy nıvıştəyon bıdəm, ımoni məsəcəxin bı "jenə qəp jəkəson”, bı həpəroə sıxanon mıəllifon qıləy ruyəninə 3 mərtəbə dıjmonım doy, ijənən votedəm, odəm bəpe çənnə nanəcib bıbu ki, bə co xonəxo dıvuədə kırtdəğə şodə, bəçəy nom şər-şəbədə pesoxto? Mılxəs, az bə hiç xonəxo votəm niki ıştı nıvıştəy bədom, bəmı pul bıdə, əvotnimən. Çımı dıloye ki, tolışon bə qəzet ıştə nıvıştəyon bıdən, imkonım bıbu hələ bəvon pulən bədom, çiç bıkəm ki, bə qəzeti koməkəti, bəbe vote ki, ni. Kali insonon bə tolışon votedən ki, çı qəzeto diyəro bındınən, bə qəzeti koməkəti məkən, əncəx ın naduroston sərəsedənin ki, ımruj çı tolışon ən yolə publika ın qəzete, ımən nıbu çiç bəkamon, ıştə fikon konco bə mızokiro bebəkamon? Qavar bı barədə tikəy fik bıkəmon? Imruj bə qəzeti jimoni pəl jəkəson, maştə ıştə milləti bədə rujədə, lap hejo ıştə bədə rujədə bəştə sə bəjeşon ki, qəzetmon məhfmon kardəmon nəbəy, ısət çəmə mudafiədə əndıni.
P.S. Bokuədə jiyə Tolışon! Bə hiç xonəxo bo qəzetiro pul mədən, ə pulon bə qəzet rəsedənin, qəzeti hisobış heste, (çimiku jəqo ə hisob hejo iminnə səhifədə bəbe), əqəm bə qəzeti koməkəti kay pidəne, ıştə puli bə hisob (anonimən bedə) dəvonən.
Bə Beytul-Moli çaş noə odəmon, ə puli hardedəşon-hardedəşon, hiççi nıbu bəmı bıvotən, qavar az ə puli bəşmə davardim? Isət dənibavardem, ə pulon bəşmə hərom zınedəm, şımə çimi cəvobi bə Xıdo bədoşon, (hələ şəhid USTODi vaxtadə dızdyə pulon parsən bəbe) fərğış ni, şımə "hardə” pul 5 mənot bə, 20 mənot bə, ya 120 mənot.
Rafiq CƏLİLOV,
"Tolışon Sədo” N: 57
26 noyabr 2013
