İli hestbe, ili nıbe, ğəyrəz Xıdo hiçki nıbe. Ne, ne, bıbaxşən, qıləy Sığalmustoni di hestbe, bı diədən dıqlə əvom jidəbe, ım əvomonən bəştə anqıştə dənıvıjə vırə ıştə səy dəfırsındəbin, əve əçəvon sə ve cəfo kəşedəbe. Ha cəfo, bəlo bəpeştən kamişi ağılmand be əvəzi, tikəyən səmə bedəbin, səmə bıbıyən dasto dınyo ha curi səfeə ko bıvotoş, omedə. Ğəyrəz...
Bə koşon sıftə de hır–həvati bino kardəbe: bıə-nıbəyşon doə, i tuloğşon hındəmoə boəşon hıryə, rojon qətəbe bə Çovondi tərəf, ha bışi, hu bışi. Hındəmoə boən hiç məqard ve ləzətin, həmən şin bedə. Roədə qıləy bə tamə dəşdə, bə iqlə votdə: çiç bəbe, bıdə ğurti çı boədə peşomom. Ə qılə ıştə fərəsati burizə doydə, bomi həxış pidə. Kamişi ro şe bə peştə ə qılə bə tamə dəşdə, ım qılə ğurtumi boə həxi səydə. Xulasə, bə Çovondi rəsyədə tuloğədə i tıləən boə bedəni, əve təyə tuluği bə dı mışt tənbəku sərəvəz kardən, tənbəkuən oqardəsə, roədə pekəşdən, oroxındən...
Ha, jıqo. Çə rujiku ve koono beşəbin, ve fəndono dəvardəbin, iqlə cınjon qətə nıbe. Ruji rujxoni bı fikən oməyn. Sıftəjon cınon bə, jiə vırəjon pəydo karde piyəy, həl bə sahati, pəydojon karde: cınon bıbu, bıbu, diy jio bə də-dupədə, vişədə bəben. Lakin, bə ro beşeədə, bə vəjon de kom silah-əsləhə şe muşkuli beşe. Qıləy dəqesış rəvo zınəy, ə qılə nizə. Im qılə ğəməş məslahat zınəy, ə qılə təvə, qıləyi kend votşe, ə qılə ox. Məxləs, bə i qılə fik ome nıznəşone. Çok be, qılə tikəy ve fəndqir be, əy votşe: hiç qılə silah peməqətəmon, oxo əmə zındənimon, cın bə çəmə və kom sıvvəto bebəşe? Cın ve veəzınə çiye, fəsono bə fəson dəşedə, qah bə kıtı oşedə, qah sio loy bedə, qah bə rıski dim dəşdə, qahan hırs bedə, ısə əmə çı bıznəmon, əv bə çəmə və kom dimo bebəşe? Imi kam vote, əy ve məsəy, əy ve vote, ımi kam məsəy. Məxləs, bə ğərol oməyn təyə dast bışun. Təyə dast həməysə çoke, cınon dənibərəmen, əvonən hoston–hostoni cıni bəqəten. De ladəye, təyə dast, səpur, dəro qınin bə vişə-ku. Ve nəvəyn, kam nıştin, kam nəvəyn, ve nıştin. Oxoy beşin qıləy dəy kəno. Bı dəy kənoən qıləy bəlelə do hestbe, hıl–kandul be. Bı doədən anqi (kandı muzi) lonə hestbe, anqiə muzon de sə-coni bə kobin, əlolə biyə ki, ov bıkırın ki, qıləy şedəbe, qıləy omedəbe. Imşon vinde, şoy-şoykuşon çıtmə jəşone: məvotbən cınon lonəmon pəydo kardımone! Isə de cınon həx–hisobi obərexnemon.
De cınon lonə vırtı–vılo karde fiki, de sıği rəsəyn bə doy: tappa–turup, dambə-durumb. Çımiku bərk rıkin bə anqon duçi bin bəvon. Umrədə anqi kunə ləzəti nıvində əvomon, ıştə umrədə sıftənnə, həmən oxonnə səfə, həm saysimə bin, həmən yəndıku co eqınin, qıləy bə dəyə səbəsaru vite, qıləy səbəsape. Əçəvon harçijonən nıbu, kamişi veəzınətijon hestbe, çok zındəbin, cınon dasto iqlə de vite rəxe bəznen... Əncax, de həyfi, çəvon çanədə, həmən bə kovrə viteku hiç kəsi xəbə ni.
Isətən votdən, ili hestbe, ili nıbe, ğəyrəz Xıdo hiç ki nıbe. Ne, ne, bıbaxşən, qıləy Sığalmustoni di hestbe, əmo, ə əvomon vəyo nin. Cınon əvonşon bə kovrə bardəbu, hələn omənin, beşənin...
"Tolışon Sədo” N:51, 27 aprel 2013-cü il
