Miri, Şımə bənə Tolışə şairi hələ tojə-tojə po qətdəjon!... Bəşmə bı roədə ve yolə uğuron orzu kardəm!
İntasi, Şımə ədəbi normonku deəro, "Bıpı ıştə həy bıçovın!" nomədə bə ğələm vardə ın təhqironə misron həm professional poetik, həmən bədii ofayə nöqteyi-nəzəro ve zəif qıləy "sıxanə kuəye"! Çı bədii ədəbiyyati, poeziya kam-ve sə beşə ha kəs, bı "sıxanə kuə" nəzər rosnəsati hiss kardedə ki, Şımə daxili aləmədə hələ veən ğəzəncın karde nıznə EQO, Şıməni həm kobud, həmən ğərəzin kardə! Çumçıko, ıştə tərəf-muqabilon mədəni səviyyə kon dərəcədə beku, həmən çəvon bə kon statusi malik beku: fərğış ni, əvoni bə i vırə, guya ım poeziya nımunəye, bənə "Bıpı ıştə həy bıçovın" tipədə insoni şəxsiyyəti kobud formədə bə məsxərə noy, əvoni de exrocə ifadon təhqir karde bə hiç kəsi rəvo doə bə ni! Im kuçə söhbəte, bə Şımə səviyyə uyğun ni, stili peqındəni, Miri!
Az zındəm ki, Şımə şəxsiyyət, mədəniyyət, mənəviyyat, əğedə, əxlaq ve zıngine! Hejo bəçəy qorışən bə Şımə ve yolə hurmətım heste! Umim heste ki, Şımə de co ğıryətinə balon Tolışi bə dınyo sivil xalqon səviyyə rosne zu soyb bəbejon! Tı ımruj bəpe bəşdə həmyaşıdon nımunə bıboş! Zındəş ki, ıştı tay-tuşon veni assimlasiya bedən! Əvon ıştə milli-mənəvi dəyəronku deəro be qorış manqur bən! Amma, həmə ne! Bo həxi vote bəbe ki, çəvonədən kali kəson hesten ki, çı Tolışi ço çəvon dılədə vəşdə! İntasi, əvon bə nez omero risk kardənin! "Jıqo” tanonku tarsdən, itot kardən! Boy, bəvonən koməkəti bıkəmon. Əvoni mətorsnəmon, Miri! Əçəvon vadoə kali səhvon de ehmoli, de itoti bə sə dənoy lozime! Həni de jıqo təhqir vardə ifadon ne! Əmə ya ıştə nıvıştəyonədə, ya da şifahi söhbətonədə hiç kəsi təhqir karde ixtiyormon ni! Hətta, əvon əməni təhqirən bıkan! Miri, əmə bəpe bə hiç pravokasiya ram nıbəmon! Çumçıko, çəmə dışmenon ən yolə orzujon hejo ıme, Miri!
Miri, Şımə şoydijon ki, əmə boştə xalqi zıvoni, mədəniyyəti roədə çənə fəal ko kardedəmon, əməni ənən ve təhqir kardedən! Bəle, tarixi dırozi həmişə jıqoye bə, boli!
Bımi bəpe petovəmon! In ro ve çətinə roye, çımı balə! Bı roədə bənə Nəvuzəli şəhid be heste! Bənə Hilali bə zindon eqne heste! İntasi, mı ıştə umri dırozi bo insoni, bı roysə şərəfinə rom nıvinde, Miri!
Miri, çımı sıxan bə Şımə kefi nıqıno! Sa kərə çok-çoki nopeqət bıkə, çımı balə!
Əqəm, çımı sıxanon bə Şımə kefi qındəbon, bəvədə mamu Şıməku uzrıj pidə!
Mehdibəy SƏFƏROV
