Ha xosə bolion, Hilalşonən qəteşone. İ manqisə veye ki, çəmə boli zindonədəy. Xıdo çəy kəybə okə, əmə kimon ki, çəmə zü iqlə bə Xıdo lovə kay rəsedə. Əy votem pidəme ki, peş Hilali həbsi çəmə rujnomədə çəmə çaşon zik kardə "imzon” bə çaş çiydənin, çimi səbəbon az zındənim, ancax ən yolə səbəbi ısət bəşmə bəvotem, çumçiko bəçəvon sə omə ko bəçımınən sə oməy.

... Peş Hilali qəte çımı qələm aşiş be, tikəy itoətım kay, həni qələmən ıştəku beşedənıbe, bə hürmətinə odəmon pearəş kardənıbe, Xıdo çəvon coni səlomət bıkə, çəvon sobnə çəmə milləti səpe gin nıbu İnşallah! Tolış votyədə şəxsən əməni ne, əvoni bə sə dəşedən, çümçıko əvon çəmə milləti dimin, çəmə milləti astovən, ovşumin, həşin! Əmə kimon? Əmə hiç ki, 2-3 kəs pedıryə şavlo eqınyəmon bə myon ki, "bə tolışi TV bıdən, çı bıznom radio bıdən”, həni votdənimon ki, kiye bəçəmə sıxani fik doəkəs, jıqo bızın nıştəmon hali sobnədə bə hali sə zikkə jəydəmon, həni votedənimon ki, ə hal ıştəku qıləy yolə sığ quli bəka bəçəmə sə, çəmə səən vırt-vılo bəbe. Məvotbən şımə səm dojnime, dəvardom bə mətləb.

Əy votdəmxo, peş Hilali qəte mınşon vanqşon kay bə lozim bə vırə, çəmə rujnomon noşone çımı vədə, xəbəşon səy:

- In rujnomonədə imzon ıştınin?

Piyəme bıvotom "ne”, peşo bəçımı axmaxa sə dəşe ki, vəy çımı nom 2-3 qlə vırədə nıvıştə bə, votme "ha, çımıne, çiç bəki?”
Oqardin bəmı votşone ki:

- Ə "çiç bəki” əmə ısət tıku xəbə bəstemon, hələm bəmə bıvot, tı kiş ki, bə tolışi nıvıştedəş? Tı zındəniş ki, şımə ın nıvıştəyon bəçikisə xoto qınyedə? Jıqo zındəşon əmə zındənimon ki, şımənən bənə Hilali İroniku "işpilyonə” pul səydəşon? Boçi votdənişon ki, "hukumət har çiy zındə, əməni bəqəten”, ısət 2-3 kəs pedıryə şavlo eqınyəşon de İroni puli bə məydon ki, tolışon hüquqon müdafiə kardedəmon, ğudur bəşon?

Hiççi vote zındənıbim, tarsiku çımı qıron larzedəbin, bəbolə Hilal, bəbolə ə şairə bolion ki, ımon əvoni heleşon kardəşone, əvon çımon dastədə çiçon kəşəşone, Xıdo bəzne. Rərəy oqardim votme ki, "az hiç Hilali zındənim, əçəy müdafiə kardəkəsən az nim, azən dı-se kərə bə rujnoməm nıvıştəme, vəssalam, vəy az hiç İroni nomım qətəme?”.

Bəki votedəş, bə odəmon ki, ə odamonku ənnə çımı de Hilali ivrədə şikilmon heste ki, hiç mıku çə şikilonədə i qləyən ni, ekardışone ə şikilon bə çımı nav, votşone "çok-çoki dyəkə, tikəy jıqo-jəqo kay ıştınən nom çı İroni siyahiyədə bebəşe, ya bəpe dyəçəmə votəy əşt-nışt bıkay, yaanki ıştı ko bı piyə sinədə fırığ bəbe”.

Xəyli şem bə fik, ıştən-bəştə votme ki, "çənnə ımon demı çok rəftar kardedən, demon tikəy alver bıkəm çok bəbe, tolışi dard-sər bomıro mandə? Az ıştə xahişon bıvotom”:

- Çok, az rozim, ancax çımınən şiməku 2-3 qlə ricom heste, iminnə əve ki, çımı hiç vırədə nomım nıbu.
Votşone ki, "bə çaş, peşo?”

- Peşo əve ki, çımı bı piyəmerdə vaxtadə ğəzəncım ni, bə qornə Boku mərkəzədə qıləy yolə obyektım bəbəy, ədəym bə kirə.

Votşone ki, "əvən bə çaş, peşo?”

Zə, vindeme ki, az çiç votedəm ımonən "bə çaş” votedən, piyəme bıvotom ki, "bəçəmə milləti qıləy TV, qıləy radio”, peşo fikim kay ki, çə TV-ku, çə radioku bəmı çiç? Ki ısət vəy ko bəka, bəştə kə nünəpul bəba, bəmı "ve sağ bıbi” bəvote? Ni bəvote, bə qornə ın sıxanon şodome bə "arxiv”, votme ki:

- Pensionerə odəmim, bəmı tikəyən nəğdə pul bıdən, azən deştə kə xanimi qədə-qədə bə Avropa ölkön bınəvom.

Bəmı tikəy de təəcübi dyəşon kay, yəğın ıştə dılədə votşone ki, "zə, ım çı axmaxa odəme, bo dınyo moli ıştə millətış həvatşe”, ancax oşkoədə bəmı votşone ki:

- Əvən bə çaş, ısət çəmənən tıku 2-3 qlə tələbmon heste, iminnə əve ki, konco nıştiş ıştə milləti əvvəl tərifkə, peşo qədə-qədə dəvard bə təhqir, bıvot ki, tolış hiç vaxt millət ni bəbe, hiç bəmə tolışə zıvonən lozim ni.

Votme ki, "bə çaş”.

- Dıminnə əve ki, deki əşt-nışt kardedəş, çəvonku bəmə çiç lozime bırosın, hiççi nyo məkə, çumçiko çəvon dılədə ğərəz tınən çəmə odəm heste.

Bımiən ıştə roziətim doy.

- Seminnəən əve ki, həni i kərəən bə tolışi mənıvışt, tırki çənnə pidə bınıvışt, kon rujnomədə pidə bətı imkon bıdəmon ki, bınıvışti, tolışonən bıtorsın, bıvot "maştə-paşo əməniən bəqəten, ki bıdu bəmə bome?”

Mılxəs, ın roziətion deştə imzomon təsdiqmon kay, hejo çəvon idarəku beşedəbim ki, vindıme çəmə kana hərəkətçionədə i kəs sıre-sıre çə idarəku beşedə, mınış vindəsati mıku xəbəş say ki:

-Atabala müəllim, tınən?

.... Əştim ki, ovi dılədəm, ıştə dastonım rostım kay bə Xıdo dərgahi, votme: ey Xudavəndi-Aləm, tı ıştən bə odəmon, komon ki, de şəytoni fitva ıştə milləti həvatedən, nəhlət bıkə, Hilaliən kəybə ro oj bıkə, umumon iqlə Tıniş ya Xıdo!....

Atabala Babayev
Boku
Tolışon Sədo, №25, 2012