Azərboyconi piraniyə ənıvıştonədə qıləyni Allahverdi Bayrami (İvıjəli) nimə əsrisə veye ki, dastko bedə de bədiiyə-tənqidiyə ofəyemonəti.
Bahandon zınedən əy bənə filoloq-şairi, tolışi zıvoni, ədəbiyoti tədqiqatəvoni. Devri mətbuatədə dərc bedə çəy həm bə tolışi, həmən bə tırki nıvıştəyonə əsəron.. 8 kitobış çap bıə.
Bı nezonədə çapo beşə çəy tojə kitob ("Votəme, ya votəmni?". B-2013, 208 səh.). Im çı şairi bə tolışi dərc bıə 4-nə kitobe.
İyo əhotə bıə A.Bayrami dəvardə 8 sorədə bə tolışi nıvıştəbıə şeeron iyən poemon. Kitob 5 baxşədə ibarəte: "In behəyon, xun bəhəyon", "Yadi çəşi doğ bınon", "Çiyo-çəyo", "Mərsiyon", iyən Poemon.
Kitobədə vırə qətəşe: 1-nə baxşədə satirikə misron, 2-nə baxşədə ithafə əsəron, 3-nə baxşədə bə devri hadison mınosibət nişo doə mılohizon, 4-nə baxşədə bə Xıdo duston həsr bıə əsəron...
Kitobo qərdbıə 4 poema: "Lələ diyən", "Votəme, ya votəmni?", "Tolışi təbiət", ""Lələ baxşe"...
Kitobi çıyo hande bezneon. 
