Əğə boyli dəpöl bıjən,
Əğə nənə kotə ojən,
Əli vədə pojə bıjən!
Həmro bəmon bə çand bəjən,
Moymon hardə dizə-dizə,
Bilə ğıbon, Musarizə.

Panə dimə xolinə zoə,
Sofə dılin, həlimə zoə,
Xəlği yolə məllimə zoə,
Çı Toloşi alimə zoə!
Ğələmi tij, qəp pakizə,
Bilə ğıbon Musarizə.

Noedən tıni peynə sədə:
Zor vırədə, zər vırədə.
Sərxi bedəş har vəyədə,
Tov əvəniy ıştı vədə-
Deşmen bəbey rizə-rizə,
Boli ğıbon, Musarizə.

Çə milləti zoəmon əmə,
Mıvpur əbiy bilə kumə,
Moypur əbıy tukə dimə.
Polo əhəyn de suə kulmə,
Tomon əboftin de pizə,
Bilə ğıbon, Musarizə.

Bı devroni vey fey mədə!
Matars, çanə con çameydə.
Bətı şeyxəti dameydə!
Navi əvəsor omeydə:
Sə vılon o bəkan zizə,
Bilə ğıbon, Musarizə.